جامعہ کراچی کے قریب پھٹنے والی پانی کی لائن کی مرمت میں تاخیر

کراچی: جامعہ کراچی کے قریب 84 انچ قطر کی پائپ لائن پھٹنے سے شہر کے بیشترعلاقوں میں پانی  کی شدید قلت ہے۔شہر قائد کو پانی کی فراہم کرنےوالی اہم لائن کی مرمت مقررہ وقت یعنی 96 گھنٹوں میں مکمل ہونا ناممکن قرار دے دی گئی ہے۔ مرمت کے دوران کیے گئے اندرونی معائنے میں لائن کا 40 فٹ سے زائد کا حصہ متاثر پایا گیا ہے۔

ترجمان واٹر کارپوریشن کے مطابق نہ صرف بڑے شگاف بلکہ متعدد چھوٹے شگاف بھی سامنے آئے ہیں جن کی مرمت بھی ضروری ہے۔ اگر متاثرہ حصے کی مکمل مرمت نہ کی گئی تو لائن دوبارہ پھٹنے کا خطرہ برقرار رہے گا۔

محکمہ انجینئرنگ کا کہنا ہے کہ اتنے وسیع نقصان کے بعد مرمت کا عمل 96 گھنٹوں میں مکمل کرنا ممکن نہیں رہا۔ ترجمان کے مطابق متاثرہ لائن پر نئے والو لگانے کی شکایات بھی موصول ہوئی تھیں جس پر ایم ڈی واٹر کارپوریشن کی ہدایت پر تحقیقات کے لیے خصوصی کمیٹی تشکیل دے دی گئی ہے۔

مزید برآں لائن پھٹنے کی وجوہات جاننے کے لیے بھی ایک علیحدہ تحقیقاتی ٹیم کام کر رہی ہے تاکہ مستقبل میں ایسے واقعات سے بچا جا سکے۔