پی ایس ایل 10 فائنل ، لاہور قلندر مقدر کا سکندر،تیسری بار چیمپئن بن گیا

لاہور: پاکستان سپر لیگ (پی ایس ایل) سیزن 10 کے فائنل میں لاہور قلندرز نے کوئٹہ گلیڈی ایٹرز کو سنسنی خیز مقابلے کے بعد 6 وکٹ سے شکست دے دی۔

قذافی اسٹیڈیم لاہور میں کھیلے گئے ایونٹ کے فائنل میں لاہور قلندرز نے فتح کے ساتھ تیسری بار پی ایس ایل کی حکمرانی کا تاج اپنے سر پر سجا لیا۔

لاہور قلندرز کے کوشل پریرا اور سکندر رضا نے پانچویں وکٹ پر 59 رنز کی ناقابل شکست شراکت قائم کی اور ٹیم کو فتح سے ہمکنار کرایا۔

کوشل پریرا نے 31 گیندوں پر4 چھکوں اور 5 چوکوں کی مدد سے 62 رنز بنائے، انہیں مین آف دی میچ قرار دیا گیا جبکہ سکندر رضا نے صرف 7 گیندوں پر 22 رنز کی برق رفتار اننگز کھیلی ۔

میچ میں کوشل پریرا اور سکندر رضا کی شراکت سے قبل کوئٹہ گلیڈی ایٹرز کی کامیابی کے امکانات کافی روشن تھے لیکن ان دونوں نے حریف ٹیم کے بولرز کی ایک نہ چلنے دی۔

اس سے قبل فائنل میں کوئٹہ گلیڈی ایٹرز نے لاہور قلندرز کو 202 رنز کا ہدف دیا، میچ میں کوئٹہ کی قیادت سعود شکیل اور لاہور کی کپتانی شاہین آفریدی کے سپرد ہے۔

کوئٹہ گلیڈی ایٹرز نے مقررہ 20 اوورز میں 8 وکٹ پر 201ء رنز اسکور کیے، حسن نواز نے 76 رنز کی اننگز کھیلی، اوشیک فرنانڈو نے 29 جبکہ فہیم اشرف نے 8 گیندوں پر 28 رنز اسکور کیے۔لاہور قلندرز کے شاہین آفریدی نے 3، حارث روف اور سلمان مرزا نے 2،2 وکٹ حاصل کیں۔

واضع رہے شاہین شاہ آفریدی کی قیادت میں لاہور قلندرز نے 2022 اور 2023ء کے بعد 2025ء میں تیسری بار پی ایس ایل کا ٹائٹل جیتا ہے۔