لاہور: پسند کی شادی کے تنازع پر باپ بیٹا قتل

لاہور کے علاقے ستوکتلہ میں موٹرسائیکل سوار4 مسلح افراد نے فائرنگ کرکے باپ بیٹے کو قتل کر دیا۔ پولیس کے مطابق واقعہ پسند کی شادی پر ہونے والے تنازع کا نتیجہ ہے۔

نجی ٹی وی کے مطابق پولیس نے بتایا کہ ملزمان گھر میں گھس کر باپ 45 سالہ سعید اور بیٹے 22 سالہ شمشاد پر فائرنگ کی، جس کے نتیجے میں دونوں موقع پر جاں بحق ہو گئے۔ مقتول شمشاد کے بھائی احسن کی پسند کی شادی پر تنازعہ کے باعث یہ واردات ہوئی۔ ملزمان واقعے کے بعد فرار ہونے میں کامیاب ہو گئے۔

پولیس نے جائے وقوعہ سے شواہد اکٹھے کر کے تحقیقات کا آغاز کر دیا ہے جبکہ لاشوں کو پوسٹ مارٹم کے لیے بھیج دیا گیا ہے۔ڈی آئی جی آپریشنز نے واقعہ کا نوٹس لیتے ہوئے ملزمان کی فوری گرفتاری کے احکامات جاری کر دیے ہیں۔