پیٹرولیم مصنوعات کی قیمتوں میں آج سے اضافے کا امکان

پیٹرولیم مصنوعات کی قیمتوں میں آج سے آئندہ 15 روز کے لیے اضافے کا امکان ہے۔
ذرائع کے مطابق پیٹرول کی قیمت میں آئندہ 15 روز کے لیے فی لیٹر۔6.60 روپے اور ڈیزل کی قیمت میں پانچ روپے ستائیس پیسے اضافے کا امکان ہے۔

پیٹرول کی قیمت میں ڈھائی فیصد اضافے کے بعد نئی قیمت 273روپے 39پیسےفی لیٹر ہونے کا امکان ہے جبکہ ڈیزل کی قیمت میں اضافے کے ساتھ نئی قیمت 278روپے 25 پیسے فی لیٹر متوقع ہے۔

اس تبدیلی کی بنیادی وجوہات شرح مبادلہ اور پیٹرولیم لیوی (پی ایل) میں رد و بدل ہیں،تاہم مٹی کے تیل (کیروسین) کی قیمت میں فی لیٹر 3روپے74 پیسے اور لائٹ ڈیزل آئل کی قیمت میں 2روپے 23پیسے کمی متوقع ہے۔

امریکی صدر ڈونلڈ ٹرمپ کے اس اعلان کے بعد کہ اگر روس نے یوکرین کے خلاف جنگ بند نہ کی تو وہ اس پر تجارتی پابندیاں مزید سخت کریں گے، بین الاقوامی منڈی میں پیٹرولیم مصنوعات (پی او ایل) کی قیمتوں میں مزید اضافہ دیکھنے میں آیا ہے، خام تیل کی قیمتیں 71 ڈالر فی بیرل سے تجاوز کرگئی ہیں اور اگر روس نے یوکرین پر جنگ بند نہ کی تو پیٹرولیم مصنوعات (پی او ایل) کی قیمتوں میں مزید اضافہ ہوگا جس کا سب سے زیادہ نقصان پاکستان جیسے درآمدی معیشت والے ملک کو ہوگا۔