پنجاب میں آندھی اور بارش سے حادثات میں 11 افراد جاں بحق، 92 زخمی

پنجاب کے مختلف علاقوں میں 24 گھنٹوں کے دوران آندھی اور بارش سے حادثات میں 11 افراد جاں بحق اور 92 زخمی ہو گئے۔

ریسکیو پنجاب کے ترجمان کے مطابق لاہور کے علاقے ہربنس پورہ میں کرنٹ لگنے سے بھائی اور بہن جاں بحق ہوئے جبکہ شیرا کوٹ میں 20 سالہ نوجوان، بہاولنگر کے علاقے منچن آباد میں مدرسے کی چھت گرنے سے 2 طالب علم اور مدینہ ٹاؤن میں کرنٹ لگنے سے 10 سالہ بچہ جان سے ہاتھ دھو بیٹھا۔

ترجمان کے مطابق اوکاڑہ کے علاقے نعیم آباد میں آسمانی بجلی گرنے سے 2 افراد جاں بحق ہوئے۔

پاکپتن کے مختلف علاقوں میں دیوار اور چھت گرنے سے 2 بچے جبکہ بھکر کے علاقے جہان خان میں چھت گرنے سے ایک شخص جان کی بازی ہار گیا۔