ڈیگاری دوہرا قتل کیس: مقتولہ کی ماں کا ڈی این اے سیمپل لے لیا گیا

ڈیگاری میں پیش آنے والے دوہرے قتل کیس کے تفتیشی عمل میں اہم پیش رفت سامنے آئی ہے۔ پولیس ذرائع کے مطابق مقتولہ بانو بی بی کی والدہ گل جان کے ڈی این اے کے نمونے حاصل کر لیے گئے ہیں۔ ڈی این اے سیمپلنگ کا یہ عمل سیریس کرائم انویسٹی گیشن ونگ کی درخواست پر کیا گیا۔

خیال رہے کہ پولیس نے مقتولہ بانو بی بی کی والدہ گل جان کو ایک ویڈیو بیان جاری کرنے پر گرفتار کر لیا ہے۔ گل جان نے ویڈیو بیان میں قتل کو بلوچی رسم و رواج کے مطابق ”سزا“ قرار دیا تھا اور اس کی حمایت کی تھی۔

پولیس سرجن ڈاکٹر عائشہ فیض نے تصدیق کی ہے کہ گل جان بی بی سے بال، خون اور حلق سے لعاب کے نمونے لیے گئے، جنہیں بعد ازاں سیل کر کے سیریس کرائم انویسٹی گیشن ونگ کے حوالے کر دیا گیا۔ ان نمونوں کو اب ڈی این اے تجزیے کے لیے پنجاب فرانزک سائنس ایجنسی کو بھجوایا جائے گا۔

پولیس سرجن کے مطابق اس سے قبل مقتولہ بانو بی بی کی قبر کشائی کے دوران بھی لاش سے ڈی این اے کے لیے نمونے لیے گئے تھے، تاکہ دونوں کے تعلق کی تصدیق ممکن ہو سکے۔

یاد رہے کہ گل جان بی بی نے ایک ویڈیو بیان میں خود بھی اپنا ڈی این اے ٹیسٹ کروانے پر آمادگی ظاہر کی تھی، جس کے بعد یہ پیش رفت سامنے آئی ہے۔

ٹک ٹاکر سمیرا راجپوت کا مبینہ قتل: ’زبردستی زہریلی گولیاں کھلائی گئیں‘، مقدمہ بیٹی کی مدعیت میں درج

کیس کی تفتیش حساس موڑ میں داخل ہو چکی ہے، اور پولیس ذرائع کا کہنا ہے کہ ڈی این اے رپورٹ کی روشنی میں معاملے میں مزید انکشافات متوقع ہیں۔