صدر مملکت کا کیپٹن محمد سرور شہید (نشان حیدر) کو خراج عقیدت

اسلام آباد: صدر مملکت نے کیپٹن محمد سرور شہید (نشان حیدر) کے 77 ویں یوم شہادت پر انہیں خراج عقیدت پیش کیا ہے۔

اپنے پیغام میں صدر مملکت آصف علی زرداری نے کہا کہ آج کے دن کشمیر کی پہلی جنگ میں کیپٹن محمد سرور شہید نے مادر وطن کیلئے جان کا نذرانہ پیش کیا، قوم کو کیپٹن محمد سرور شہید کی جرات، استقامت اور عظیم قربانی پر فخر ہے۔

انہوں نے کہا کہ آج کا محفوظ پاکستان ہمارے ہیروز کی عظیم قربانیوں کا نتیجہ ہے، پوری قوم کیپٹن محمد سرور شہید کی بہادری اور قربانی کو سلام پیش کرتی ہے۔

آصف زرداری کا مزید کہنا تھا کہ کیپٹن محمد سرور نے اپنی جان دے کر قومی دفاع کا ناقابل فراموش باب رقم کیا، شہدا کی قربانیاں ملکی دفاع اور قومی استحکام کی بنیاد ہیں، قوم کیپٹن محمد سرور شہید کی قربانی کو ہمیشہ یاد رکھے گی۔