ڈیڑھ سال میں 63 غیر قانونی کال سینٹرز سے 255 غیر ملکی گرفتار

اسلام آباد: نیشنل سائبر کرائمز انوسٹی گیشن ایجنسی کی جانب سے غیرقانونی کال سینٹرز کےخلاف کارروائیوں سے متعلق رپورٹ سینیٹ قائمہ کمیٹی آئی ٹی میں  جمع کروائی گئی ہے، جس کے مطابق  گزشتہ ڈیڑھ سال میں غیر قانونی کال سینٹرز پر 63 چھاپے مارے گئے،کارروائیوں میں 195 پاکستانی اور 255 غیر ملکی گرفتار کیے گئے۔

سرکاری دستاویز کے مطابق  ان کارروائیوں میں 195 پاکستانی اور 255 غیر ملکی گرفتار کیے گئے، غیرقانونی کال سینٹرز کیخلاف 54 مقدمات درج اور مالی فراڈ کا حجم 72 کروڑ روپے سے زائد ریکارڈ کیا گیا، جبکہ نیشنل سائبر کرائم انوسٹی گیشن ایجنسی نے 4 کروڑ روپے سے زائد رقم ریکور کی۔

رپورٹ میں  بتایا گیا کہ اسلام آباد میں 17 کال سینٹرز پر چھاپے مار کر 10 مقامی اور 183 غیر ملکی گرفتار کیے گئے، اور غیرقانونی کال سینٹرز کا 6 کروڑ روپے کا فراڈ بے نقاب ہوا۔ اسی طرح کراچی میں 19 غیر قانونی کال سینٹرز کیخلاف کارروائی کی گئی،کراچی میں 76 ملوث پاکستانیوں میں سے 44 کو گرفتار کیا گیا، تاہم کال سینٹرز کیخلاف کاروائی میں کوئی مالی ریکوری نہیں ہوسکی۔

رپورٹ کے مطابق راولپنڈی میں 8 کال سینٹرز میں چھاپوں کے دوران 32 گرفتاریاں کی گئیں اور 58 لاکھ روپے کی ریکوری کی گئی، فیصل آباد میں سات جعلی کال سینٹرز پر چھاپے مارے گئے، اس دوران 78 مقامی اور 72 غیر ملکی افراد کو گرفتار کیا گیا اور سات ایف آئی آرز درج کرکے 2 لاکھ روپے کی ریکوری کی گئی۔

اسی طرح ملتان میں ایک چھاپے کے دوان ملوث تمام 8 مقامی کو گرفتار کیا گیا،لاہور میں 11 کال سینٹرز میں چھاپوں کے دوران 23 کو گرفتار کیا گیا۔