آپریشن اور نقل مکانی قابلِ قبول نہیں،وزیرِ اعلٰی ہائوس میں علاقائی جرگہ

پشاور: وزیرِ اعلی خیبر پختونخوا علی امین گنڈا پور کی میزبانی میں امن و امان سے متعلق علاقائی جرگوں کا سلسلہ جاری ہے جس میں قبائلی عمائدین کا کہنا ہے کہ آپریشن اور نقل مکانی قابلِ قبول نہیں ۔

پیر کو وزیرِ اعلٰی ہاؤس میں ہونے والے جرگے میں ضلع باجوڑ اور مہمند کے عمائدین اور منتخب عوامی نمائندوں نے شرکت کی۔

وزیرِ اعلٰی ہاؤس کی جانب سے جاری کیے گئے بیان کے مطابق جرگوں کی جانب سے پانچ سفارشات رکھی گئی ہیں۔ ان سفارشات میں کہا گیا ہے حکومت ہمیں امن دے تو ہم ہر قسم کے تعاون کے لیے تیار ہیں۔ دہشت گردی کے خلاف سب متحد ہیں اور دہشتگرد سب کے دشمن ہیں۔ سفارشات میں مزید کہا گیا ہے کہ آپریشن اور نقل مقانی قابلِ قبول نہیں۔

دہشتگردی کے مستقل خاتمے کے لیے وفاقی اور صوبائی حکومتیں عمائدین سمیت دیگر اسٹیک ہولڈرز پر مشتمل ایک جرگہ تشکیل دے جو افغان حکومت اور عوام سے بامقصد مذاکرات کرے۔

جرگے میں سفارش کی گئی ہے کہ مقامی جرگوں کی کارروائی ایک مثبت علامت ہے۔ اسے مزید با مقصد بنایا جائے تاکہ اِس کا اچھا نتیجہ دوسرے علاقوں کے لیے بھی مفید ثابت ہو۔