Ummat News Latest Urdu News in Pakistan Politics Headlines Videos
کراچی : آگ لگنے سے لانڈھی ایکسپورٹ پروسیسنگ زون کی فیکٹری کی پوری عمارت گر گئی۔دیکھتے ہی دیکھتے تین عمارتوں کو اپنی لپیٹ میں لے لیا۔ ریسکیو حکام کے مطابق آگ کی شدت کو تیسرے درجے کی قرار دیا گیا ہے جبکہ فائر بریگیڈ کی 24 گاڑیاں آگ پر قابو پانے میں مصروف رہیں۔
رجمان کے مطابق، آگ سے متاثرہ ایک عمارت مکمل طور پر منہدم ہوچکی ہے۔ ریسکیو ٹیموں نے بروقت کارروائی کرتے ہوئے جھلسنے والے 8 مزدوروں کو عمارت سے نکال لیا، جنہیں فوری طور پر طبی امداد کے لیے اسپتال منتقل کیا گیا۔
زخمیوں کی شناخت عبدالرشید ولد ظہیر جانی (عمر 26 سال)، فردین ولد فیصل (عمر 28 سال)، ارسلان ولد رمضان، (عمر 34 سال)، شہزاد ولد عنایت (عمر 30 سال)، رضوان ولد حنیف (عمر 38 سال)، طاہر عباس ولد صدیق، (عمر 40 سال)، محمد الطاف ولد غلام (عمر 48 سال) اور جلال ولد خوشحال خان (عمر 30 سال) کے نام سے ہوئی ہے۔
ریسکیو ذرائع کا کہنا ہے کہ آگ کپڑوں کی فیکٹری میں لگی تھی، جس کے بعد وہ تیزی سے پھیل کر دیگر قریبی عمارتوں تک جا پہنچی۔ آگ پر قابو پانے کی کوششیں کئی گھنٹے جاری رہیں اور دھوئیں کے بادل دور دور سے دکھائی دیتے رہے۔فائر بریگیڈ حکام کا کہنا ہے کہ ابتدائی تحقیقات کے بعد ہی آگ لگنے کی وجہ معلوم ہوسکے گی۔
چیف فائر آفیسر نے کہاکہ فیکٹری میں لنڈے کا کپڑا موجود تھا جس سے آگ کی شدت بڑھی،ہم نے پہلے بھی کہا تھا کہ فیکٹریوں کو سروے کرائیں،فیکٹریوں کو ارسال سروے فارمز بھی اب تک ہمیں واپس نہیں بھجوائے گئے،ہم نے آفر کی تھی کہ فیکٹری میں ریسکیو ٹریننگ بھی فراہم کردیں گے،فیکٹری میں لنڈے کا کپڑا ری سائیکل ہوتا تھا، کیمیکل بھی موجود تھا۔
