پیمرا ہیڈکوارٹرز اسلام آباد میں کیبل ٹی وی لائسنسز کے اجراء کی تقریب

اسلام آباد  پاکستان الیکٹرانک میڈیا ریگولیٹری اتھارٹی(پیمرا) کی جانب سے آج مؤرخہ 11اگست 2025ء کو پیمرا ہیڈکوارٹرز، اسلام آباد میں ضلعی سطح پرکامیاب بولی دہندگان کو کیبل ٹی وی لائسنسز کے اجراء کے سلسلے میں ایک تقریب کا انعقاد کیا گیا۔ چیئرمین پیمرا محمد سلیم نے معزز مہمانوں کو خوش آمدید کہا۔

یہاں یہ امر قابلِ ذکر ہے کہ پیمرا نے ضلعی سطح پر کیبل ٹی وی لائسنسز کا اجراء پہلی بار متعارف کروایا ہے اور پہلے مرحلے میں اتھارٹی نے ملک بھر کے 143اضلاع میں لائسنسز کے اجراء کیلئے خواہشمند کمپنیوں اور افرادسے درخواستوں کی طلبی کیلئے فروری 2025ء میں قومی اخبارات اور پیمرا کی ویب سائٹ پر اشتہارات دئیے جن کی ٹیلی ویژن چینلز، ایف ایم ریڈیو اور کیبل ٹی وی پربھی تشہیر کی گئی۔جس کے نتیجے میں پورے پاکستان سے  36کمپنیوں نے 91درخواستیں جمع کروائیں۔ بولیوں کا انعقاد 9اضلاع کیلئے کیا گیا جن میں میانوالی، سیالکوٹ، سوات، ایبٹ آباد، مظفر گڑھ، ساہیوال، پشاور، راولپنڈی اور اٹک شامل ہیں۔ جبکہ 44اضلاع جہاں ایک یا دو درخواستیں موصول ہوئیں وہاں آفر لیٹر دیئے گئے۔

بولیوں کے کامیاب انعقاد کے بعد 67لائسنسز کیلئے 29کمپنیاں عبوری طور پر اہل قرار پائیں۔ اُن میں سے جن کمپنیوں نے اہلیت کے معیار کے مطابق دستاویزات مکمل کر دیں ہیں اُن کو آج لائسنسز کا اجراء کیا گیاہے۔ جن میں 20کمپنیاں شامل ہیں جنہیں 37اضلاع کیلئے 42لائسنسز کا اجراء کیا گیاہے۔

اس موقع پر چیئرمین پیمرا محمد سلیم بیگ نے تمام لائسنس یافتگان کو مبارکباد دی اور کہا کہ میں اُمید کرتا ہوں کہ آپ لوگوں کو میعاری تفریح اور معلومات فراہم کریں گے اور پیمرا قوانین کو ملحوظِ خاطر رکھیں گے اور مثبت کردار(Fair Play)یقینی بناتے ہوئے نئے نیٹ ورکس کا آغاز کریں گے۔  انہوں نے مزید کہا کہ اتھارٹی نے دوسرے مرحلے کیلئے بھی اشتہارات دئیے ہیں اور درخواستیں جمع کروانے کی تاریخ میں 20دن کی توسیع کی گئی ہے امید کرتاہوں اُس میں بھی آپ لوگ بھرپور شرکت کریں گے۔

اس موقع پر ایگزیکٹو ڈائریکٹر جنرل (لائسنسنگ ڈسٹری بیوشن) سردار عرفان اشرف خان،  ایگزیکٹو ڈائریکٹر جنرل(لائسنسنگ براڈکاسٹ میڈیا)وکیل خان، ایگزیکٹو ڈائریکٹر جنرل(آپریشنز براڈکاسٹ میڈیا و تعلقاتِ عامہ محمد طاہر)، ایگزیکٹو ڈائریکٹر جنرل(ایڈمن) خرم صدیقی، ڈائریکٹر جنرل(پنجاب) اکرام برکت،ڈائریکٹر جنرل (لائسنسنگ ڈسٹری بیوشن) عمر وقاص قریشی، ڈائریکٹر جنرل (چیئرمین سیکریٹریٹ) تمثیل حیدر،ڈائریکٹر جنرل (ایگزیکٹو ممبر سیکریٹ) رانا احمد مصطفےٰ، سیکریٹری اتھارٹی سعید احمد سومرو، ریجنل ڈائریکٹر پیمرا لاہورقاسم احمد، ریجنل ڈائریکٹر اسلام آباد لیاقت شاہ، ریجنل ڈائریکٹرفیصل آبادوقاص احمد، ریجنل ڈائریکٹررانا محمد آصف، ریجنل ڈائریکٹرسرگودھا محمد خالق، ڈائریکٹرملتان ابوالحسیب سید علی مدثر،ریجنل ڈائریکٹرحیدرآباد نثار احمدپنور،ریجنل ڈائریکٹرسکھر سید مدثرعلی شاہ معصومی، ریجنل ڈائریکٹرخیبر پختونخواہ (ساؤتھ) حمایت شاہ، ریجنل ڈائریکٹرخیبر پختونخواہ (نارتھ) اورنگزیب خلجی اور پیمرا کے دیگر افسران بھی موجود تھے۔