کراچی:کورنگی داؤد گوٹھ میں چھری کے وار سے بیٹا جاں بحق، باپ زخمی

کراچی: کورنگی داؤد گوٹھ میں چھری کے وار سے بیٹا جاں بحق اور باپ زخمی ہوگیا ، قاتل موقع سے اپنی بیوی سمیت فرار ہوگیا ۔ پولیس نے ملزم کے گھر سے آلہ قتل چھری برآمد کر لی۔

ترجمان کراچی پولیس کا کہنا ہے مقتول کی شناخت 19 سالہ ہارون ولد فرید عالم کے نام سے کی گئی، مقتول کے پڑوسی نے بتایا کہ مقتول نے اپنے گھر کے سامنے بارش کا پانی روکنے کے لیے پتھر لگائے تھے، جو اس کے پڑوسی احمد کبیر نے اٹھا کر پھینک دیے اور غلیظ زبان استعمال کی۔

ہارون جب اپنے گھر سے باہر نکلا تو اس نے دوبارہ پتھر لگا دیے اسی دوران احمد کبیر بھی اپنے گھر سے نکل آیا اور دونوں کے درمیان تلخ کلامی ہوگئی۔

احمد کبیر نے ہارون کو کہا کہ میں اس سے پہلے بھی قتل کر چکا ہوں میرے لیے قتل کرنا کوئی مشکل کام نہیں ہے پھر وہ اپنے گھرگیا اور چھری لا کر ہارون کے پیٹ میں گھونپ دیں، ملزم نے ہارون کے پیٹ میں تین مرتبہ چھری گھونپی، اسی دوران ہارون کے والد آگئے اور اسے روکنے کی کوشش کی جس پر ملزم نے اس کے والد پر بھی چھری کے 4 وار کیے جس میں سے 2 وار کان پر تھے جس سے ان کا کان کٹ کر الگ ہوگیا جبکہ ہاتھ اور سر پر بھی چھری کے وار سے زخم آئے۔

واردات کے بعد ملزم موقع سے فرار ہوگیا، واقعے کے وقت قاتل کی اہلیہ گھر پر تھی تاہم جب پولیس وہاں پہنچی تو اس کے اہلیہ بھی غائب تھی۔

پولیس نے ملزم کے گھر سے آلہ قتل چھری برآمد کر کے ملزم کی تلاش شروع کر دی ، مقتول پلاسٹک کی شیٹ کا کام کرتا تھا جبکہ اس کے والد راج مستری ہیں، مقتول چار بہن بھائیوں میں تیسرے نمبر پر تھا جب کہ ملزم ماہی گیر ہے جو کھلے سمندر میں جا کر مچھلی کا شکار کرنے کا کام کرتا ہے۔