عمران خان کی ضمانت، جشن منانے پر خواتین سمیت 7 افراد گرفتار

لاہور: بانی پی ٹی آئی عمران خان کی 9 مئی مقدمات میں ضمانت منظور ہونے کے عدالتی فیصلے پر جشن منانے والے 7 افراد کو گرفتار کرکے مقدمہ درج کرلیا گیا۔

نجی ٹی وی کے مطابق ملزمان کے خلاف مقدمہ تھانہ سول لائنز لاہور میں پولیس کی مدعیت میں درج کیا گیا، پولیس کے مطابق موقع سے کچھ خواتین کو بھی حراست میں لیا گیا۔

پولیس کے مطابق گرفتار افراد مال روڈ بلاک کرکے ٹریفک کے بہاؤ میں خلل ڈال رہےتھے، گرفتار افراد کو ضابطے کی کارروائی کے بعد عدالت میں پیش کیا جائے گا۔

واضح رہے کہ سپریم کورٹ نے گزشتہ روز بانی پی ٹی آئی عمران خان کی 9 مئی کے 8 مقدمات میں ضمانت منظور کی تھی۔ چیف جسٹس جسٹس یحییٰ آفریدی کی سربراہی میں 3رکنی بینچ نے 9 مئی کے مقدمات میں عمران خان کی ضمانت منظور کی۔