پاکستان اور بنگلادیش میں 6 معاہدوں پر دستخط

وزیرِ خارجہ اسحاق ڈار کے حالیہ دورۂ بنگلادیش کے دوران دونوں ممالک کے درمیان چھ معاہدے اور یادداشتیں طے پائیں۔ اس موقع پر پاکستان نے بنگلادیش کے طلبہ کے لیے "پاکستان۔بنگلادیش نالج کوریڈور” کے آغاز کا اعلان کیا، جس کے تحت آئندہ پانچ برسوں میں 500 اسکالرشپس دی جائیں گی۔ ان میں سے ایک چوتھائی اسکالرشپس شعبۂ طب کے لیے مختص ہوں گی، جبکہ 100 بنگلادیشی سول سرونٹس کو تربیت دینے کا پروگرام بھی شامل ہے۔دورے کے دوران سفارت کاروں اور حکومتی اہلکاروں کے لیے ویزا ختم کرنے پر اتفاق ہوا، نیز ویزا سہولتوں میں آسانی اور فضائی روابط کی بحالی پر اطمینان کا اظہار کیا گیا۔ اسی طرح دونوں ممالک کی فارن سروس اکیڈمیز اور تھنک ٹینکس کے درمیان تعاون کے معاہدے بھی طے پائے۔مزید برآں پاکستان اور بنگلادیش نے تجارت، سرمایہ کاری، تعلیم، توانائی اور صحت سمیت مختلف شعبوں میں تعاون بڑھانے پر گفتگو کی۔