بھارت نے مقبوضہ کشمیر کے دریاؤں پر قائم ڈیموں کے تمام دروازے کھول دیے

بھارت نے مقبوضہ کشمیر کے دریاؤں پر قائم ڈیموں کے تمام دروازے کھول دیے ہیں، جس کے نتیجے میں بڑی مقدار میں پانی چھوڑے جانے کا امکان ہے۔

بھارتی سرکاری ذرائع کے مطابق ڈیموں سے تقریباً دو لاکھ کیوسک پانی خارج کیا جا سکتا ہے، تاہم یہ واضح نہیں کہ پانی کا اخراج ایک ہی بار میں ہوگا یا مرحلہ وار۔

بھارتی میڈیا نے اطلاع دی ہے کہ بالائی علاقوں میں شدید بارشوں کے باعث دریائے چناب میں پانی کی سطح خطرناک حد تک بلند ہو رہی ہے۔

اسی صورتحال کے پیش نظر بھارتی ہائی کمیشن کی فراہم کردہ معلومات پر انڈس واٹر کمشنر نے فلڈ الرٹ جاری کر دیا ہے۔ الرٹ میں کہا گیا ہے کہ دریائے ستلج میں ہیڈ ہریکے اور فیروزپور کے مقامات پر اونچے درجے کا سیلاب متوقع ہے۔

مزید بتایا گیا ہے کہ دریائے راوی کے مادھوپور اور دریائے چناب کے اکھنور کے مقامات پر بھی اونچے درجے کے سیلاب کا خدشہ ہے۔