پنجاب کے بیشتر اضلاع میں مزید طوفانی بارشوں کی پیشگوئی،الرٹ جاری

پنجاب میں مون سون بارشوں کا نواں اسپیل کل سے شروع ہوگا۔

ترجمان پی ڈی ایم اے کے مطابق مون سون بارشوں کا نواں اسپیل 29 اگست سے 2 ستمبر تک جاری رہے گا، جس دوران پنجاب کے بیشتر اضلاع میں شدید بارشیں متوقع ہیں۔

محکمہ موسمیات کے مطابق راولپنڈی، مری، گلیات، اٹک، جہلم، چکوال، لاہور، گجرات، سیالکوٹ اور گوجرانوالہ سمیت ڈیرہ غازی خان، ملتان اور راجن پور میں بھی طوفانی بارشیں ہو سکتی ہیں۔

ریلیف کمشنر پنجاب نبیل جاوید نے ضلعی انتظامیہ اور تمام محکموں کو ہائی الرٹ رہنے کی ہدایات دی ہیں۔ ان کا کہنا ہے کہ دریائے چناب، راوی اور ستلج میں انتہائی اونچے درجے کا سیلاب ہے جبکہ بڑے شہروں میں برساتی نالوں کے بپھرنے کا خدشہ ہے۔

تمام ڈپٹی کمشنرز اور افسران کو فیلڈ میں موجود رہنے، جبکہ صحت، آبپاشی، مواصلات، لوکل گورنمنٹ اور لائیو اسٹاک کے محکموں کو الرٹ رہنے کی ہدایات دی گئی ہیں۔

شہریوں سے اپیل کی گئی ہے کہ خراب موسم میں احتیاط کریں، دریاؤں کے کناروں پر جانے اور غیر ضروری سفر سے گریز کریں۔ کسی بھی ایمرجنسی کی صورت میں پی ڈی ایم اے ہیلپ لائن 1129 پر رابطہ کیا جا سکتا ہے۔