ملک کے مختلف حصوں میں بارش، سیلاب متاثرین کی مشکلات میں اضافہ

ملک کے کئی علاقوں میں بارش کا نیا سلسلہ شروع ہوگیا ہے جس کے باعث سیلاب زدہ علاقوں میں مشکلات مزید بڑھ گئی ہیں۔

چنیوٹ میں دو گھنٹے سے زائد جاری رہنے والی بارش نے متاثرین کو سخت پریشانی میں ڈال دیا۔ شیخوپورہ اور گردونواح میں بھی تیز بارش کے بعد نشیبی علاقے پانی میں ڈوب گئے، جبکہ جہلم میں بارش کے بعد ندی نالے بپھرنے سے متعدد علاقے زیرِ آب آگئے۔

ندی نالوں کا پانی آبادیوں میں داخل ہونے کے باعث ریسکیو ٹیموں کو امدادی کارروائیوں میں دشواری پیش آرہی ہے۔ دریائے ستلج میں گنڈاسنگھ والا کے مقام پر غیر معمولی سیلاب کے بعد قریبی دیہات خالی کرانے کے اعلانات بھی کیے گئے ہیں۔

بھارت کی جانب سے دریائے جہلم میں پانی چھوڑنے کے بعد خوشاب کے لیے خطرات بڑھ گئے ہیں جبکہ جھنگ میں بڑا ریلا داخل ہونے سے شہر کے تاریخی پل کے قریب شگاف ڈال دیا گیا۔

ادھر پشاور میں موسلا دھار بارش کے باعث صدر، جی ٹی روڈ، گلبہار اور گورنر ہاؤس کے قریب شیر شاہ سوری روڈ پر پانی جمع ہوگیا۔ آزاد کشمیر کے ضلع باغ میں نالہ ماہل میں طغیانی کے بعد نالے کے کنارے آباد بستی کو خالی کرالیا گیا۔

محکمہ موسمیات کے مطابق آج اسلام آباد، پنجاب، خیبرپختونخوا اور کشمیر کے مختلف حصوں میں مزید بارش کا امکان ہے، جبکہ شام یا رات کے اوقات میں سندھ، بلوچستان اور گلگت بلتستان میں بھی بارش کی پیش گوئی کی گئی ہے۔