عوام کی جان بچانا اولین ترجیح ہے،مریم اورنگزیب

پنجاب کی سینئر وزیر مریم اورنگزیب نے کہا ہے کہ سیلاب سے متاثر ہونے والے اضلاع میں ہائی الرٹ جاری ہے اور اس وقت سب سے اہم ذمہ داری لوگوں کی جانیں بچانا ہے۔

لاہور میں پریس کانفرنس کرتے ہوئے ان کا کہنا تھا کہ حالیہ سیلاب سے 20 لاکھ سے زائد افراد متاثر ہوئے ہیں جبکہ 7 لاکھ 50 ہزار سے زیادہ افراد کو محفوظ مقامات پر منتقل کیا گیا ہے۔

انہوں نے بتایا کہ پنجاب کی تاریخ کا سب سے بڑا ریسکیو آپریشن جاری ہے جس میں 5 لاکھ سے زائد مویشی محفوظ مقامات پر پہنچائے گئے، 400 سے زائد وٹرنری کیمپس قائم کیے گئے اور مویشیوں کے چارے کا بھی انتظام کیا گیا۔

مریم اورنگزیب کے مطابق متاثرہ علاقوں میں امدادی سرگرمیاں جاری ہیں اور نالوں پر قائم تجاوزات کا خاتمہ کیا جا رہا ہے۔ سیلابی صورتِ حال ختم ہونے کے بعد نقصانات کا تخمینہ لگا کر متاثرین کو معاوضہ فراہم کیا جائے گا۔

انہوں نے مزید کہا کہ دریائے راوی، ستلج اور چناب میں سیلاب کی صورتحال برقرار ہے۔ چناب میں خانکی اور قادرآباد پر اونچے درجے کا سیلاب ہے جبکہ تریموں برج سے 3 لاکھ 61 ہزار کیوسک پانی کا ریلا گزر رہا ہے۔ راوی میں جسڑ کے مقام پر درمیانے درجے اور بلوکی ہیڈ ورکس پر 2 لاکھ 82 ہزار کیوسک پانی کا بہاؤ ریکارڈ کیا گیا ہے۔ ستلج میں گنڈا سنگھ والا کے مقام پر پانی کی شدت انتہائی زیادہ ہے۔

صوبائی وزیر نے کہا کہ متاثرہ علاقوں سے انخلاء مکمل کر لیا گیا ہے اور تحصیل و ضلعی سطح پر ہنگامی بنیادوں پر ریلیف فراہم کیا جا رہا ہے۔ عوام سے اپیل ہے کہ وہ انتظامیہ کے ساتھ تعاون کریں۔