اسلام آباد میں "معرکہ حق” قومی یادگار کی تعمیر کا آغاز

اسلام آباد کے سیکٹر H-8 میں بھارتی جارحیت کے خلاف شاندار کامیابی کی یاد میں قومی یادگار **”معرکہ حق”** کی تعمیر شروع کر دی گئی ہے۔ یہ یادگار ایک زیر استعمال پارک میں بنائی جا رہی ہے جسے جدید اور پرکشش عوامی مقام میں تبدیل کیا جائے گا۔

یادگار کا تھیم قرآن پاک کی آیت *بُنْيَانٌ مَّرْصُوْص* (سیسہ پلائی ہوئی دیوار) سے لیا گیا ہے، جو قوم کے اتحاد اور غیر متزلزل عزم کی علامت ہے۔

یادگار کے ڈیزائن اور تعمیر کی ذمہ داری فرنٹیئر ورکس آرگنائزیشن (FWO) کو دی گئی ہے جبکہ کیپیٹل ڈویلپمنٹ اتھارٹی (CDA) نے منصوبے کے لیے مختص زمین فراہم کر دی ہے۔

ذرائع کے مطابق منصوبہ وزیراعظم شہباز شریف کی خصوصی ہدایت اور حکومتی معاونت سے شروع کیا گیا ہے۔ وزیراعظم نے 13 اور 14 اگست کی درمیانی شب اس یادگار کے ڈیزائن کی نقاب کشائی کی تھی جس کے بعد تعمیراتی عمل تیزی سے جاری ہے۔

منصوبے میں عالمی معیار کے تعمیراتی میٹیریل اور جدید انجینئرنگ اصولوں کو مدنظر رکھا جا رہا ہے۔ یادگار کا مقصد قومی اتحاد کو خراج تحسین پیش کرنا، اجتماعی قربانیوں کو یادگار بنانا اور عوامی شعور و فخر کو اجاگر کرنا ہے۔

ذرائع کا کہنا ہے کہ "معرکہ حق” اسلام آباد کے منظرنامے میں ایک باوقار اضافہ ہوگا اور قوم کے اتحاد کا استعارہ بن کر سامنے آئے گا۔