9 مئی کیسز: یاسمین راشد کی سزا معطلی کیلئے لاہور ہائیکورٹ سے رجوع

پاکستان تحریک انصاف کی رہنما اور سابق صوبائی وزیرِ صحت ڈاکٹر یاسمین راشد نے 9 مئی کے واقعات سے متعلق تین مقدمات میں سنائی گئی سزاؤں کے خلاف لاہور ہائیکورٹ میں اپیل دائر کر دی۔

درخواست گزار نے مؤقف اپنایا کہ انسدادِ دہشت گردی کی عدالت نے حقائق کا درست انداز میں جائزہ نہیں لیا اور سنائی گئی سزائیں شواہد کے برعکس ہیں۔

اپیل میں استدعا کی گئی ہے کہ ہائیکورٹ اپیلوں کے حتمی فیصلے تک سزا کو معطل کرے اور رہائی کا حکم دے۔

واضح رہے کہ ڈاکٹر یاسمین راشد پر تھانہ شادمان حملے، شیرپاؤ پل پر جلاؤ گھیراؤ اور جناح ہاؤس کے قریب گاڑیاں جلانے کے مقدمات درج ہیں، جن میں انسدادِ دہشت گردی کی عدالت نے انہیں 10،10 سال قید کی سزا سنائی تھی۔