کراچی میں لین دین کے تنازع پر بھائی نے بھائی کو قتل کردیا

کراچی: بلدیہ ٹاؤن میں جھگڑے کے دوران دو بھائیوں کی ایک دوسرے پر فائرنگ کے نتیجے میں چھوٹا بھائی جان کی بازی ہار گیا۔

پولیس کے مطابق اتوار کو سعید آباد تھانے کے علاقے بلدیہ ٹاؤن صدام چوک کے قریب مسافر مزدا کے لین دین کا تنازع ہوا، جس پر 30 سالہ ایاز اور 35 سالہ امتیاز نے ایک دوسرے پر فائرنگ کر دی، جنہیں فوری طور پر شدید زخمی حالت میں سول اسپتال منتقل کیا گیا۔ فائرنگ سے شدید زخمی 30 سالہ ایاز آج اسپتال میں زخموں کی تاب نہ لاتے ہوئے دوران علاج دم توڑ گیا۔

ایس ایچ اوسعید آباد پرویز سولنگی کے مطابق جھگڑے کے دوران بڑے بھائی امتیاز نے پہلے چھوٹے بھائی ایاز پر فائرنگ کی ، جس کے باعث ایاز شدید زخمی ہوگیا، بعد ازاں شدید زخمی حالت میں ایاز نے بڑے بھائی سے اسلحہ چھین کر اسی پر فائرنگ کر دی تھی جس کے نتیجے میں بڑا بھائی امتیاز بھی زخمی ہوگیا تھا۔واقعے کے مزید تفتیش جاری ہے۔