سہ ملکی سیریز میں افغانستان کی پہلی فتح

 

افغانستان نے سہ ملکی ٹی20 سیریز کے تیسرے میچ میں متحدہ عرب امارات (یو اے ای) کو 38 رنز سے شکست دے کر اپنی پہلی کامیابی حاصل کر لی۔

شارجہ میں کھیلے گئے میچ میں یو اے ای نے ٹاس جیت کر پہلے فیلڈنگ کا فیصلہ کیا۔ افغانستان نے مقررہ 20 اوورز میں 4 وکٹ کے نقصان پر 188 رنز بنائے، جس کے جواب میں میزبان ٹیم 20 اوورز میں 8 وکٹ کے نقصان پر صرف 150 رنز ہی بنا سکی۔ یوں افغان ٹیم نے میچ 38 رنز سے اپنے نام کیا۔

یو اے ای کے کپتان محمد وسیم نے 67 رنز بنائے، جبکہ راہول چوپڑا 52 رنز کے ساتھ ناقابل شکست رہے، لیکن ان کی ٹیم کامیابی حاصل نہ کر سکی۔

افغان ٹیم کے کپتان راشد خان نے صرف 21 رنز دے کر 3 وکٹیں حاصل کیں اور ٹی20 کرکٹ میں سب سے زیادہ وکٹیں لینے کا ریکارڈ بھی اپنے نام کر لیا۔ شرف الدین اشرف نے بھی 3 وکٹیں حاصل کیں اور میچ کے بہترین کھلاڑی قرار پائے۔

افغان بیٹنگ میں ابراہیم زادران نے 63 اور صدیق اللہ اتل نے 54 رنز کی اہم اننگز کھیلیں جبکہ کریم جنت 23 رنز کے ساتھ ناقابل شکست رہے۔ یو اے ای کی جانب سے محمد روہید اور صغیر خان نے 2، 2 وکٹیں حاصل کیں۔

افغانستان اور یو اے ای دونوں ٹیموں نے سیریز کے پہلے میچز میں پاکستان کے ہاتھوں شکست کا سامنا کیا تھا۔

افغانستان کی فائنل الیون میں رحمان اللہ گرباز، ابراہیم زادران، صدیق اللہ اتل، درویش رسولی، کریم جنت، عظمت اللہ عمر زئی، راشد خان، محمد نبی، شرف الدین اشرف اور فضل الحق فاروقی شامل تھے۔ یو اے ای کی ٹیم میں محمد وسیم، محمد ذہیب، آصف خان، راہول چوپڑا، ایتھان ڈیسوزا، ہرشیت کوشک، دھریو پرشانت، صغیر خان، حیدر علی، محمد روہید اور جنید صدیقی شامل تھے۔