یورپی یونین کا پاکستان کے سیلاب متاثرین کے لیے 35 کروڑ کی ہنگامی امداد کا اعلان

یورپی یونین نے اعلان کیا ہے کہ پاکستان میں حالیہ سیلاب سے متاثرہ افراد کی مدد کے لیے 35 کروڑ روپے کی ہنگامی امداد فراہم کی جائے گی۔

سماجی رابطے کی ویب سائٹ ایکس پر جاری بیان میں کہا گیا کہ تباہ کن سیلاب نے درجنوں جانیں لے لی ہیں جبکہ کئی لوگ اب بھی لاپتہ ہیں۔ اس مشکل وقت میں متاثرہ خاندانوں کی بحالی کے لیے فوری امداد فراہم کی جا رہی ہے۔

یورپی یونین کے مطابق یہ امداد معتبر شراکت دار تنظیموں کے ذریعے متاثرین تک پہنچائی جائے گی، جس میں طبی سہولیات، صاف پانی، صفائی کا نظام اور بیماریوں کے پھیلاؤ کو روکنے کے لیے صحت عامہ کی سہولتیں شامل ہوں گی۔

مزید کہا گیا ہے کہ سیلاب سے زیادہ متاثر ہونے والے خاندانوں کو ان کی بنیادی ضروریات پوری کرنے کے لیے نقد امداد بھی فراہم کی جائے گی۔