میکرون اور سعودی ولی عہد 22 ستمبر کو نیویارک میں دو ریاستی حل کانفرنس کی مشترکہ صدارت کریں گے

پیرس: فرانسیسی صدر ایمانول میکرون نے کہا ہے کہ انہوں نے سعودی ولی عہد سے بات چیت کی ہے اور دونوں رہنما 22 ستمبر کو نیویارک میں دو ریاستی حل کانفرنس کی مشترکہ صدارت کریں گے۔

صدر میکرون نے امریکا کی جانب سے فلسطینی حکام کو ویزا نہ دینے کے فیصلے کو ناقابلِ قبول قرار دیتے ہوئے کہا کہ میزبان ملک معاہدے کے تحت فلسطینی نمائندگی کو یقینی بنایا جانا چاہیے۔

انہوں نے کہا کہ مقصد دو ریاستی حل کے لیے عالمی سطح پر وسیع حمایت حاصل کرنا ہے، کیونکہ یہی اسرائیلیوں اور فلسطینیوں دونوں کی جائز امنگوں کو پورا کرنے کا واحد راستہ ہے۔

فرانسیسی صدر کے مطابق اس کے لیے مستقل جنگ بندی، تمام یرغمالیوں کی رہائی، غزہ کے لیے بڑے پیمانے پر انسانی امداد اور ایک استحکام مشن کی تعیناتی ضروری ہے۔

ان کا مزید کہنا تھا کہ حماس کو غیر مسلح کر کے غزہ کی حکمرانی سے باہر کرنا، فلسطینی اتھارٹی کو اصلاحات کے ذریعے مضبوط بنانا اور غزہ کی مکمل تعمیر نو بھی اس منصوبے کا حصہ ہیں۔

صدر میکرون نے واضح کیا کہ کوئی بھی جارحیت، الحاق یا جبری بے دخلی اس کوشش کو آگے بڑھنے سے نہیں روک سکتی۔