فیلڈ مارشل سیدعاصم منیر2027 تک رہیں گے،رانا ثناء اللہ

اسلام آباد: وزیر اعظم کے مشیر برائے سیاسی امور رانا ثناء اللہ خان نے کہاہے کہ فیلڈ مارشل سیدعاصم منیرکی مدت ملازمت نومبر 2027 میں مکمل ہوگی۔

انہوں نے کہا کہ پہلے آرمی چیف کی تعیناتی چار سال کیلئے ہوتی تھی، 1976 سے یہ مدت تین سال کردی گئی، اب آرمی چیف کی مدت پانچ سال ہوگئی ہے۔فیلڈ مارشل عاصم منیر کی بطور آرمی چیف تعیناتی تین سال کیلئے ہوئی تھی، کیونکہ اس وقت یہی قانون تھا لیکن اب پانچ سال کا قانون آگیا ہے تو وہ 2027 تک آرمی چیف رہیں گے۔

نہوں نے کہا کہ ایئر چیف کی مدت پوری ہوچکی تھی لیکن آئین میں ترمیم کے بعد ان کی تعیناتی خود بخود پانچ سال ہوگئی، اس کیلئے کسی نئے نوٹیفکیشن کی ضرورت نہیں ، جب ان کے پانچ سال پورے ہوں گے تو وہ ریٹائر ہوجائیں گے۔

انہوں نے کہا کہ فیلڈ مارشل کی مدت ملازمت نومبر 2027 میں مکمل ہوگی اور اگر کوئی ایکسٹینشن نہیں ہوتی تو وہ ریٹائر ہوجائیں گے۔ رانا ثناء اللہ کے مطابق اس ملک میں چار، چار ایکسٹینشنز ہوتی رہی ہیں، کچھ خود کو ہی ایکسٹینشن دیے رہے ہیں، ایک ایسا آدمی جو فیلڈ مارشل ہے، جس نے یہ رتبہ کمایا ہے، خود سے نہیں لیا بلکہ حکومت نے اسے یہ رتبہ دیا ہے، میرا نہیں خیال کہ ان سے زیادہ کوئی ایکسٹینشن کا مستحق ہے، نئے قانون کے تحت عمر کی آخری حد بھی ختم ہوگئی ہے۔

واضح رہے کہ اس سے پہلے رانا ثناء اللہ نے ایک اور ٹی وی پروگرام میں گفتگو کرتے ہوئے کہا تھا کہ نواز شریف، شہباز شریف اور مریم نواز کی مری میٹنگ میں تسلسل کا فیصلہ کیا گیا ہے۔