مارخور کے شکار کا پرمٹ ریکارڈ 10 کروڑ روپے میں نیلام

گلگت بلتستان میں ٹرافی ہنٹنگ پروگرام کے دوران قومی جانور مارخور کے شکار کا پرمٹ تاریخ کی بلند ترین قیمت 10 کروڑ روپے میں نیلام ہوا۔ نانگا پربت کنزروینسی ایریا کے لیے استور مارخور کے شکار کا یہ پرمٹ 3 لاکھ 70 ہزار ڈالر میں ایک غیر ملکی شکاری نے حاصل کیا۔

نیلامی کی تقریب فاریسٹ، پارکس اینڈ وائلڈ لائف کمپلیکس گلگت میں منعقد ہوئی، جس میں ملکی و غیر ملکی شکاریوں سمیت ماہرینِ جنگلی حیات نے شرکت کی۔ تقریب میں مارخور کے علاوہ ہمالیائی آئبیکس اور بلیو شیپ کے شکار کے پرمٹس بھی فروخت کیے گئے۔

حکام کے مطابق شکار سیزن 2025-26 کے لیے 118 پرمٹس پیش کیے گئے، جن میں 4 استور مارخور، 100 ہمالیائی آئبیکس اور 14 بلیو شیپ شامل ہیں۔

ٹرافی ہنٹنگ سے حاصل ہونے والی آمدنی کا 80 فیصد حصہ مقامی کمیونٹیز کو دیا جاتا ہے تاکہ جنگلی حیات کے تحفظ، مقامی ترقی اور سیاحت کے فروغ پر خرچ ہو سکے۔

ماہرین کا کہنا ہے کہ مارخور کے شکار کا پرمٹ 10 کروڑ روپے میں فروخت ہونا ایک تاریخی ریکارڈ ہے جو گلگت بلتستان کی جنگلی حیات کی عالمی اہمیت کو اجاگر کرتا ہے۔