پختونخوا حکومت کا افغان مہاجرین کی واپسی فوری روکنے کا مطالبہ

پشاور: خیبر پختونخوا حکومت نے افغان مہاجرین کی واپسی کے عمل کو فوری طور پر روکنے کا مطالبہ کیا ہے۔ صوبائی مشیر اطلاعات بیرسٹر ڈاکٹر سیف نے اپنے بیان میں کہا کہ انسانی ہمدردی اور خیر سگالی کے تحت یہ فیصلہ ضروری ہے، کیونکہ افغانستان اس وقت تباہ کن زلزلے کے نقصانات سے دوچار ہے۔

انہوں نے بتایا کہ حالیہ زلزلے میں جاں بحق اور زخمی ہونے والوں میں بڑی تعداد واپس جانے والے مہاجرین کی ہے۔ ایسے حالات میں افغانستان کی مدد کی جانی چاہیے نہ کہ اس پر مزید بوجھ ڈالا جائے۔

بیرسٹر سیف کے مطابق غربت کے شکار ملک پر مہاجرین کی واپسی کا دباؤ ڈالنا اخلاقی طور پر بھی درست نہیں۔ افغانستان اس وقت متاثرین کی بحالی کے لیے مدد کا طلبگار ہے اور بطور پڑوسی و مسلمان ملک پاکستان کی ذمہ داری ہے کہ وہ بھرپور تعاون کرے۔

مشیر اطلاعات نے بتایا کہ خیبر پختونخوا حکومت اپنے وسائل سے بڑھ کر افغان متاثرین کی امداد میں مصروف ہے۔ وزیراعلیٰ علی امین گنڈا پور نے افغان سفیر سے ملاقات میں متاثرین کے لیے صحت کی مفت سہولیات سمیت ہر ممکن تعاون کی پیشکش کی ہے۔ وزیراعلیٰ کی ہدایت پر 35 ٹرکوں پر مشتمل امدادی سامان بھی افغان حکام کے حوالے کر دیا گیا ہے۔