نوشہروفیروز میں ٹریفک حادثہ، سات افراد جاں بحق

ضلع نوشہروفیروز کے صدوجہ تھانے کی حدود میں نیشنل ہائی وے پر افسوسناک حادثہ پیش آیا جہاں ایک ڈمپر نے کار کو ٹکر ماردی، نتیجے میں 7 افراد موقع پر ہی جاں بحق ہوگئے۔ لاشوں کو مورو اسپتال منتقل کردیا گیا۔

پولیس کے مطابق شاہراہ پر ایک خراب ٹرالر کھڑا تھا جس کی وجہ سے آگے جانے والی مہران کار نے رفتار کم کی، اسی دوران پیچھے سے آنے والے ڈمپر نے گاڑی کو شدید ٹکر دے ماری جس سے کار تباہ ہوگئی۔

حادثے میں جاں بحق ہونے والوں میں 2 مرد، 3 خواتین اور 2 بچے شامل ہیں۔ تمام افراد ضلع خیرپور کے علاقے لقمان جانوری کے رہائشی تھے۔ جاں بحق افراد میں غلام محمد ولد بخشن جانوری اور علی احمد جانوری کی شناخت کر لی گئی، دیگر خواتین اور بچوں کی شناخت کا عمل جاری ہے۔

ایس ایس پی نوشہروفیروز میر روحل خان کھوسو نے حادثے کا نوٹس لیتے ہوئے ڈمپر کو تحویل میں لینے اور مقدمہ درج کرنے کا حکم دے دیا۔ ایس ایچ او صدوجہ اور ڈی ایس پی مورو موقع پر پہنچ گئے جبکہ ڈی ایچ او نوشہروفیروز کی جانب سے ایمبولینسیں بھیجی گئیں اور لاشوں کو اسپتال منتقل کیا گیا۔ پولیس نے ڈمپر کو اپنی تحویل میں لے کر مزید تفتیش شروع کردی ہے۔