موسمیاتی تبدیلی کے پیش نظر دریاؤں کا تحفظ لازمی ہے: بیرسٹر سیف

 

پشاور: مشیر اطلاعات خیبرپختونخوا بیرسٹر ڈاکٹر سیف نے کہا ہے کہ موسمیاتی تبدیلیوں کے تناظر میں دریاؤں کا تحفظ وقت کی ضرورت ہے۔

اپنے بیان میں انہوں نے کہا کہ دریاؤں کے کناروں پر قائم تجاوزات کے خلاف بلا امتیاز آپریشن جاری ہے۔ وزیراعلیٰ خیبرپختونخوا نے تمام اداروں کو ہدایت دی ہے کہ کسی دباؤ کے بغیر تجاوزات ختم کی جائیں، اور یہ کارروائی اس وقت تک جاری رہے گی جب تک مکمل خاتمہ نہ ہو جائے۔

بیرسٹر سیف کا کہنا تھا کہ دریاؤں کے اطراف میں قائم غیر قانونی تعمیرات انسانی جانوں کے ضیاع کا باعث بن رہی ہیں۔ حالیہ سیلابی نقصان کی ایک بڑی وجہ بھی یہی تجاوزات اور آبی گزرگاہوں میں رکاوٹیں تھیں۔

انہوں نے مزید کہا کہ موسمیاتی تبدیلی کے خطرات کے پیش نظر ریور پروٹیکشن ایکٹ میں ترامیم زیر غور ہیں، تاکہ دریاؤں کو سیلابی صورتحال کے مقابلے میں مزید مؤثر اور محفوظ بنایا جا سکے۔