ملتان: شہری آبادی بچانے کیلیے بند میں شگاف ڈالنے سے 70 گاؤں غرقاب

ملتان: تحصیل جلال پور پیروالا سیلاب میں گھر گئی، شہری آبادی کو خالی کروانے کے اقدامات، بازار بند کرواديے گئے، شہری آبادی بچانے کے لیے مضافاتی بند میں شگاف ڈالنے سے 70 گاؤں ڈوب گئے۔

ملتان شہرکے قریب اکبر فلڈ بند پر پانی کی سطح بلند ہوگئی، شیر شاہ ٹول پلازہ کی سڑک پر پانی آگیا، مظفر گڑھ میں زمیندارہ بند ٹوٹ گيا، متعدد بستیاں پانی میں گھر گئيں، ہزاروں ایکڑ پر فصلوں کو نقصان پہنچا، سیلابی پانی میں گھرے مظفر گڑھ میں مزید شدید بارش ہوئی، کئی علاقے پانی میں ڈوب گئے، گلی محلوں میں پانی جمع اور لوگ گھروں میں محصور ہوگئے۔

رحیم یار خان میں لیاقت پور میں بھی بند ٹوٹ گیا، دیہی علاقے زیر آب آگئے، متاثرہ علاقوں میں ریسکیو کارروائياں جاری ہیں، علاقے کے 16 دیہات میں محصور 2 ہزار افراد کو محفوظ مقام پر منتقل کر دیا گيا۔

 جلالپور پیروالا سے 1500 افراد محفوظ مقامات پر منتقل

وزیراعلیٰ پنجاب مریم نواز  کی ہدایت پر جلالپور پیروالا سے آبادی کا محفوظ انخلاء جاری ہے۔1500 افراد کو بحفاظت نکال کر محفوظ مقامات پر منتقل کر دیا گیا۔ انخلا آپریشن میں آرمی ایوی ایشن اورپی اے ایف ہیلی کاپٹر نے ریسیکیو ریلیف آپریشن میں حصہ لیا۔ آرمی ایوی ایشن ا ورپی اے ایف ہیلی کاپٹر کے ذریعے جلالپور پیروالا کے بلند مقامات کے پناہ گزینوں کوخشک ر اشن کی فراہم کیا جارہا ہے۔

وزیراعلیٰ مریم نواز کی ہدایت پر جلالپورپیروالا میں متاثرین کی مدد کے لیے ضروری مشینری پہنچا دی گئی۔ کیج شمالی کے سیلاب متاثرہ علاقوں سے بھی آبادی کا محفوظ انخلا مکمل کر لیا گیا۔ وزیراعلیٰ  کی ہدایت پر بوٹس پر سوار تمام افراد کو لائف جیکٹس پہنائی گئیں ۔ ریسکیو1122 اور دیگر اداروں کی ٹیمیں بوٹس پر متاثرین کے انخلاء میں سرگرعمل ہیں۔ عورتوں اور بچوں سمیت متاثرین کے خاندان کو محفوظ مقام پر پہنچا یا گیا۔

دریائے سندھ میں آج انتہائی اونچے درجے کا سیلاب متوقع ہے، کوٹ مٹھن کے مقام پر پانی کی سطح میں اضافہ ہوگیا، کچے سے بڑی تعداد میں لوگوں کی محفوظ مقامات کی جانب نقل مکانی جاری ہے۔

دریائے سندھ کے گڈو بیراج کے مقام پر پنجاب سے سیلابی پانی کی آمد کا سلسلہ جاری ہے، کشمور کے کچے کے علاقے خطرے کی زد میں ہیں، دادو کی کیرتھر پہاڑی سلسلوں میں بارشوں کے بعد ندی نالوں میں طغیانی آگئی۔

وزیراعظم شہباز شریف نے  این ڈی ایم اے کو سیلابی صورتحال میں امدادی کارروائیاں تیز کرنے کی ہدایت کردی۔

سیلابی صورتحال اور ریسکیو اقدامات سے متعلق جائزہ اجلاس میں وزیر اعظم نے کہا کہ سیلاب میں لاپتا افراد کی تلاش کا عمل تیز کیا جائے۔