کراچی میں آج 100 ملی میٹر سے زائد بارش کا امکان، اربن فلڈنگ کا خدشہ

کراچی میں مون سون بارشوں کا سلسلہ شدت اختیار کرنے لگا ہے۔ محکمہ موسمیات کے مطابق سندھ میں موجود مون سون سسٹم ڈیپ ڈپریشن میں تبدیل ہو چکا ہے جس کے باعث آج شہر میں موسلا دھار سے شدید بارش کا امکان ہے۔

ماہرین کے مطابق کراچی میں آج 4 سے 6 اسپیلز متوقع ہیں جن میں بعض مقامات پر بارش کی مقدار 100 ملی میٹر سے بھی تجاوز کر سکتی ہے۔ محکمہ موسمیات نے خبردار کیا ہے کہ یہ ایک غیر معمولی موسمی نظام ہے جو بھارت کی جانب سے سندھ میں داخل ہوا ہے اور اس کا راستہ غیر واضح ہونے کے باعث بارش کی شدت مختلف علاقوں میں مختلف رہنے کا امکان ہے۔

شدید بارشوں کے باعث اربن فلڈنگ کا خطرہ ظاہر کیا گیا ہے جبکہ گزشتہ روز ملیر ندی میں بھی برساتی پانی کے باعث سیلابی کیفیت پیدا ہو گئی تھی۔

موسمی صورتحال کے پیش نظر جناح سندھ میڈیکل یونیورسٹی نے آج کے تمام امتحانات ملتوی کر دیے ہیں اور ورک فرام ہوم پالیسی کے تحت آن لائن کلاسز کا اعلان کیا ہے۔ وائس چانسلر کے مطابق طلبہ اور عملے کی حفاظت کو مدنظر رکھتے ہوئے یہ فیصلہ کیا گیا۔

گزشتہ روز سے شہر میں وقفے وقفے سے ہلکی اور تیز بارش کا سلسلہ جاری ہے جس سے نشیبی علاقوں میں پانی جمع ہو چکا ہے۔

انتظامیہ اور محکمہ موسمیات نے شہریوں سے اپیل کی ہے کہ وہ غیر ضروری سفر سے گریز کریں، بجلی کے کھمبوں، ننگی تاروں اور گہرے پانی والے مقامات سے دور رہیں، اور کسی بھی ایمرجنسی کی صورت میں فوری طور پر ریسکیو اداروں سے رابطہ کریں۔