راولپنڈی میں ڈینگی کے وار، 12 نئے مریض رپورٹ

 

راولپنڈی میں ڈینگی کیسز میں اضافہ جاری ہے، گزشتہ 24 گھنٹوں میں مزید 12 مریض سامنے آ گئے۔ محکمہ صحت کے مطابق رواں سال اب تک ضلع میں 6 ہزار 342 افراد کی اسکریننگ کی جا چکی ہے جن میں ڈینگی کے 244 کیسز کی تصدیق ہوئی۔

اس وقت اسپتالوں میں 60 مریض زیر علاج ہیں جبکہ کسی ہلاکت کی اطلاع نہیں ملی۔ ڈینگی سرویلنس کے لیے 1290 ٹیمیں سرگرم عمل ہیں جنہوں نے 46 لاکھ 97 ہزار سے زائد گھروں کی جانچ کی۔ اب تک ایک لاکھ 10 ہزار سے زیادہ گھروں میں لاروا پایا گیا، جن میں سے ایک لاکھ 25 ہزار 879 لاروا تلف کر دیے گئے۔

ایس او پیز کی خلاف ورزی پر 3 ہزار 484 مقدمات درج ہوئے، 1596 عمارتیں سیل، 3170 چالان اور 93 لاکھ روپے سے زائد جرمانے عائد کیے گئے۔

محکمہ صحت کے مطابق ڈینگی ہاٹ اسپاٹس میں ڈھوک حکم داد، سی ٹی سی 10، سی ٹی سی 2 ڈھوک کالا خان، بنگش کالونی، چک جلال دین، افندی کالونی، دھوک منشی، دھمیال، کھڈیوت شاہ چن چراغ اور دھوک حسو شامل ہیں۔