ایس پی عائشہ بٹ کو عالمی ایوارڈ، پاکستان کا نام روشن

پنجاب پولیس کی باہمت خاتون افسر ایس پی عائشہ بٹ کو بین الاقوامی سطح پر شاندار کارکردگی کے اعتراف میں ’’ایکسلینس ان پرفارمنس ایوارڈ 2025‘‘ سے نوازا گیا۔

یہ ایوارڈ اسکاٹ لینڈ کے شہر گلاسگو میں ہونے والی انٹرنیشنل ایسوسی ایشن آف ویمن پولیس (IAWP) کی 62ویں سالانہ کانفرنس کے دوران دیا گیا، جس میں دنیا بھر کے 40 ممالک سے 300 سے زائد خواتین پولیس افسران شریک ہوئیں۔

تقریب میں IAWP کی صدر جولیا جیگر نے ایس پی عائشہ بٹ کو ان کی مثالی خدمات کے اعتراف میں یہ عالمی اعزاز پیش کیا۔ یہ ایوارڈ ہر سال صرف ایک خاتون پولیس افسر کو دیا جاتا ہے جو اپنی سروس کے ذریعے معاشرے پر مثبت اثرات ڈالے۔

ایس پی عائشہ بٹ اس وقت گوجرانوالہ میں سٹی ٹریفک آفیسر (CTO) کی حیثیت سے خدمات انجام دے رہی ہیں۔ انہیں یہ اعزاز ٹریفک سیفٹی اقدامات، عوام اور پولیس کے درمیان بہتر تعلقات قائم کرنے اور فرائض کی انجام دہی میں نمایاں کارکردگی پر دیا گیا۔

پنجاب پولیس کی قیادت اور افسران نے ایس پی عائشہ بٹ کو مبارکباد پیش کرتے ہوئے کہا کہ یہ ایوارڈ پوری فورس کے لیے فخر کا باعث ہے۔