ایشیا کپ: بھارت کا آج یو اے ای سے مقابلہ

ٹی ٹوئنٹی ایشیا کپ میں بھارتی ٹیم اپنا پہلا میچ آج دبئی میں متحدہ عرب امارات کے خلاف کھیلے گی۔ میچ مقامی وقت کے مطابق رات ساڑھے سات بجے شروع ہوگا۔

بھارتی ٹیم طویل وقفے کے بعد انٹرنیشنل کرکٹ میں واپسی کر رہی ہے اور بطور دفاعی چیمپیئن ایونٹ کی فیورٹ قرار دی جا رہی ہے۔ شبمن گل نائب کپتان کی حیثیت سے ٹی ٹوئنٹی اسکواڈ میں شامل ہیں، وہ حالیہ آئی پی ایل سیزن میں 650 رنز اور 155 سے زائد اسٹرائیک ریٹ کے ساتھ نمایاں کارکردگی دکھا چکے ہیں۔

یو اے ای کی ٹیم کی کوچنگ سابق بھارتی کھلاڑی لال چند راجپوت کر رہے ہیں، جو 2007 ٹی ٹوئنٹی ورلڈ کپ جیتنے والی بھارتی ٹیم کے کوچ بھی رہ چکے ہیں۔

میزبان ٹیم حالیہ سہ ملکی سیریز میں پاکستان اور افغانستان کے خلاف شکست کھا چکی ہے جبکہ اس سے پہلے یوگینڈا کے ہاتھوں بھی ناکام رہی تھی۔