فیڈرل کانسٹیبلری ہیڈکوارٹر پشاور سے اسلام آباد منتقل کرنے کا فیصلہ

اسلام آباد: حکومت نے فیڈرل کانسٹیبلری (ایف سی) کے ہیڈکوارٹر کو پشاور سے اسلام آباد منتقل کرنے کا فیصلہ کر لیا ہے۔

وفاقی وزیر داخلہ محسن نقوی کی زیر صدارت سی ڈی اے ہیڈکوارٹرز میں اہم اجلاس ہوا جس میں وزیر مملکت برائے داخلہ طلال چوہدری، وفاقی سیکریٹری داخلہ، کمانڈنٹ اور ڈپٹی کمانڈنٹ ایف سی، چیئرمین سی ڈی اے، آئی جی اسلام آباد، ڈپٹی کمشنر اور دیگر اعلیٰ حکام شریک ہوئے۔

اجلاس میں ہیڈکوارٹر کے لیے دارالحکومت میں موزوں زمین کی نشاندہی کی ہدایت دی گئی جبکہ ماسٹر پلان طلب کر لیا گیا۔ محسن نقوی نے کہا کہ نئی اراضی کا انتخاب کرتے وقت ہیڈکوارٹرز اور ٹریننگ کی ضروریات کو مدنظر رکھا جائے۔

انہوں نے مزید کہا کہ فیڈرل کانسٹیبلری کو جدید خطوط پر استوار کر کے ایک مؤثر اور منظم فورس میں تبدیل کیا جائے گا۔