قطر: عرب اسلامی وزرائے خارجہ کا اجلاس آج،اسحاق ڈار نمائندگی کریں گے

دوحہ: قطر کے دارالحکومت دوحہ میں ہنگامی عرب اسلامی سربراہی اجلاس کی تیاری کے لیے وزرائے خارجہ کا اجلاس آج ہوگا، جس میں پاکستان کے ڈپٹی وزیراعظم و وزیرِ خارجہ سینیٹر اسحاق ڈار بھی شرکت کریں گے۔

قطر کی وزارت خارجہ نے بتایا ہے کہ اجلاس میں خلیجی ریاست کے خلاف اسرائیلی حملے کے حوالے سے قرارداد پیش کی جائے گی۔ وزارت خارجہ کے ترجمان ماجد بن محمد الانصاری نے کہا کہ اجلاس کا انعقاد اسرائیلی جارحیت کے خلاف عرب اور اسلامی یکجہتی کی عکاسی کرتا ہے۔

واضح رہے کہ ہنگامی عرب اسلامی سربراہی اجلاس 15 ستمبر کو ہوگا، جس میں پاکستان کے وزیراعظم شہباز شریف شرکت کریں گے۔ سعودی وزیر خارجہ شہزادہ فیصل بن فرحان بھی دوحہ پہنچ چکے ہیں۔

پاکستان کے دفتر خارجہ نے کہا کہ پاکستان قطر کے ساتھ تعلقات کو انتہائی اہمیت دیتا ہے اور خطے میں اسرائیلی جارحیت کی شدید مذمت کرتا ہے۔ یہ ہفتے کے دوران وزیراعظم شہباز شریف کا قطر کا دوسرا دورہ ہے۔