اسلام آباد سمیت مختلف علاقوں میں بارش کی پیشگوئی

محکمہ موسمیات نے پیشگوئی کی ہے کہ آج اسلام آباد سمیت ملک کے کئی حصوں میں گرج چمک کے ساتھ بارش کا امکان ہے۔

محکمہ کے مطابق خیبرپختونخوا، خطۂ پوٹھوہار، شمال مشرقی پنجاب، کشمیر اور گلگت بلتستان میں آندھی، تیز ہواؤں اور بارش کا امکان ظاہر کیا گیا ہے۔ بالائی خیبرپختونخوا، خطہ پوٹھوہار، کشمیر اور پہاڑی علاقوں میں کہیں کہیں ژالہ باری اور تیز بارش بھی ہو سکتی ہے، جبکہ ملک کے دیگر بیشتر حصوں میں موسم خشک اور گرم رہنے کا امکان ہے۔

اسلام آباد اور گردونواح میں بارش کے ساتھ گرج چمک اور ژالہ باری کا امکان ہے، جبکہ راولپنڈی، مری، گلیات، جہلم، اٹک اور چکوال میں بھی بارش متوقع ہے۔ اسی طرح لاہور، سیالکوٹ، سرگودھا، خوشاب، نارووال، حافظ آباد، فیصل آباد، منڈی بہاؤالدین، گجرات، قصور اور گوجرانوالہ میں گرج چمک کے ساتھ بارش کی پیشگوئی کی گئی ہے۔

محکمہ موسمیات نے کہا ہے کہ خیبرپختونخوا کے دیر، چترال، سوات، کوہستان، شانگلہ، بٹگرام، مانسہرہ، ایبٹ آباد، ہری پور، بونیر، مالاکنڈ، باجوڑ، مہمند، چارسدہ، نوشہرہ، مردان، صوابی، خیبر، اورکزئی، کرم، پشاور، کوہاٹ، ہنگو، کرک اور وزیرستان میں بھی بارش کا امکان ہے۔

بلوچستان کے جنوبی حصوں میں مطلع جزوی ابرآلود رہے گا، جبکہ سندھ کے ساحلی علاقوں میں چند مقامات پر بارش ہو سکتی ہے۔ آزاد کشمیر اور گلگت بلتستان میں بھی تیز ہواؤں کے ساتھ بارش کی پیشگوئی کی گئی ہے۔

گزشتہ 24 گھنٹوں کے دوران ملک کے بیشتر علاقوں میں موسم گرم اور خشک رہا، تاہم بالائی خیبرپختونخوا میں چند مقامات پر بارش جبکہ کراچی میں ہلکی بوندا باندی ریکارڈ کی گئی۔