ریاض کی بلند عمارتیں پاکستان اور سعودی پرچم کے رنگوں سے روشن

سعودی عرب کے دارالحکومت ریاض میں بلند و بالا عمارتوں کو پاکستان اور سعودی عرب کے پرچم کے رنگوں سے سجایا گیا۔ عمارتوں پر پاکستان کا سبز و سفید ہلالی پرچم اور سعودی عرب کا سبز پرچم جگمگاتا رہا، جسے دونوں ممالک کے شہریوں نے بے حد سراہا۔

یہ اقدام اس موقع پر سامنے آیا ہے جب پاکستان اور سعودی عرب کے درمیان ریاض میں "اسٹریٹجک باہمی دفاعی معاہدے” (SMDA) پر دستخط کیے گئے۔ معاہدے پر سعودی ولی عہد محمد بن سلمان اور وزیرِاعظم پاکستان شہباز شریف نے دستخط کیے۔

اس دفاعی معاہدے کا مقصد دونوں ممالک کے درمیان تعاون کو مزید فروغ دینا اور کسی بھی بیرونی جارحیت کے خلاف مشترکہ دفاع کو یقینی بنانا ہے۔ معاہدے کے مطابق اگر کسی ایک ملک پر حملہ ہوتا ہے تو اسے دونوں ممالک کے خلاف جارحیت تصور کیا جائے گا۔

یہ معاہدہ نہ صرف دونوں برادر اسلامی ممالک کی سلامتی کو مضبوط بنانے کے لیے اہم ہے بلکہ خطے اور دنیا میں امن و استحکام کے قیام کے مشترکہ عزم کی بھی عکاسی کرتا ہے۔