عمران خان کی ویڈیو لنک پیشی،عدالت کی سخت ایس او پیز جاری

انسداد دہشتگردی عدالت نے بانی پاکستان تحریکِ انصاف (پی ٹی آئی) عمران خان کی ویڈیو لنک پیشی کے لیے سخت ایس او پیز جاری کر دی ہیں۔

عدالت کے حکم نامے کے مطابق ویڈیو لنک کارروائی کی ریکارڈنگ صرف عدالت خود کرے گی اور کسی اور شخص کو ریکارڈنگ کی اجازت نہیں ہوگی۔ عدالت کے اندر موبائل فون یا کسی بھی قسم کی ریکارڈنگ ڈیوائس لے جانا سختی سے ممنوع ہے۔

ایس او پیز میں واضح کیا گیا ہے کہ اگر کوئی شخص ریکارڈنگ کے دوران پکڑا گیا تو اس کے خلاف فوجداری قوانین کے تحت کارروائی کی جائے گی۔ مزید برآں، کسی کو ویڈیو لنک کارروائی کا ٹرانسکرپٹ حاصل کرنے کی اجازت نہیں ہوگی۔

انسداد دہشتگردی عدالت کے پیرا 11 اور 12 کے مطابق یہ ایس او پیز عدالت کے اندر اور باہر نمایاں جگہوں پر آویزاں کی جائیں گی۔