سکھر میں بااثر وڈیرے کا اونٹنی پر تشدد، ٹانگ توڑ دی گئی

سکھر: تحصیل صالح پٹ میں بااثر وڈیرے کی جانب سے مبینہ طور پر ایک اونٹنی پر شدید تشدد کیا گیا، جس کے نتیجے میں اس کی ٹانگ ٹوٹ گئی۔

اونٹنی کے مالک کے مطابق جانور کھیت میں گھس کر پانی پی رہا تھا جس پر وڈیرے نے غصے میں آ کر اسے ٹریکٹر سے باندھ کر گھسیٹا اور ڈنڈوں سے بھی مارا۔ زخمی اونٹنی کو اسپتال لے جایا گیا تو ڈاکٹروں نے علاج سے انکار کر دیا۔

وزیراعلیٰ سندھ مراد علی شاہ نے واقعے کا نوٹس لیتے ہوئے میئر سکھر سے رپورٹ طلب کر لی اور چیئرمین ڈسٹرکٹ کونسل کو اونٹنی کے علاج کی فوری ہدایت دی۔

پولیس کے مطابق اونٹنی کے مالک کی مدعیت میں مقدمہ درج کرلیا گیا ہے، جس میں نامزد تین ملزمان میں سے ایک کو گرفتار کر لیا گیا جبکہ دیگر کی گرفتاری کے لیے چھاپے مارے جا رہے ہیں۔