مریم نواز سے جرمن طبی وفد کی ملاقات،کینسر کے علاج میں تعاون پر اتفاق

لاہور: وزیراعلیٰ پنجاب مریم نواز شریف سے جرمن ادارے ہوپ چلڈرن کینسر سینٹر کے اعلیٰ سطحی وفد نے ملاقات کی، جس میں بچوں کے کینسر کے علاج اور تحقیق کے شعبے میں تعاون پر اصولی اتفاق کیا گیا۔

جرمن وفد کی قیادت پروفیسر ڈاکٹر اسٹیفن مائیکل نے کی، وفد میں **ہائیڈل برگ یونیورسٹی ہسپتال، جرمن کینسر ریسرچ سینٹر (DKFZ) اور ہوپ چلڈرن کینسر سینٹر (KiTZ) کے ماہرین شامل تھے۔

وزیراعلیٰ مریم نواز نے کہا کہ پنجاب خطے کا پہلا صوبہ ہے جہاں ابلیشن کینسر ٹریٹمنٹ متعارف کرایا گیا، جبکہ لاہور میں تعمیر ہونے والا نواز شریف کینسر ہسپتال ملک کا سب سے بڑا اور جدید ترین ادارہ ہوگا۔

انہوں نے مزید کہا کہ چلڈرن ہسپتال لاہور میں کینسر کے علاج کے لیے جرمن ماہرین کی معاونت کو قدر کی نگاہ سے دیکھا جائے گا، جب کہ  جرمنی کی جدید ٹیکنالوجی اور جوائنٹ ٹریننگ پروگرامز** سے خاطر خواہ نتائج حاصل ہوں گے۔

ہائیڈل برگ سٹی کونسل کے پارلیمانی لیڈر وسیم بٹ نے کہا کہ لاہور اور ہائیڈل برگ کے درمیان تعلیمی اور ثقافتی تعلقات مزید مضبوط ہو رہے ہیں۔

لارڈ میئر پروفیسر ڈاکٹر ایکارٹ ورزنر نے مریم نواز کی مہمان نوازی پر شکریہ ادا کیا اور کہا کہ دونوں شہروں کے عوام کے درمیان تعاون ایک نئے باب کا آغاز ہے۔

ڈاکٹر اسٹیفن مائیکل نے کہا کہ پنجاب کے اسپتال کم وسائل کے باوجود معیاری علاج فراہم کر رہے ہیں جو قابلِ تعریف ہے۔ انہوں نے زور دیا کہ پاکستان اور جرمنی کے اداروں کے درمیان تحقیق اور تربیت کا اشتراک مزید مثبت نتائج لائے گا۔