بھارت نے آئندہ حملہ کیا تو سعودی عرب پاکستان کیساتھ کھڑا ہوگا

لندن: وزیر دفاع خواجہ آصف نے کہا ہے کہ اگر بھارت نے آئندہ پاکستان پر حملہ کیا تو سعودی عرب ہمارے ساتھ کھڑا ہوگا۔

نجی ٹی وی سے گفتگو میں ان کا کہنا تھا کہ پاکستان اور سعودی عرب کے درمیان ہونے والے دفاعی معاہدے میں تمام ضروری پہلو شامل ہیں۔ اس معاہدے کے بعد کسی بھی جارحیت کی صورت میں سعودی عرب پاکستان کے ساتھ کھڑا ہوگا۔

وزیر دفاع نے مزید کہا کہ سعودی عرب کا مغربی ممالک پر انحصار کم ہوگا اور پاکستان وہاں اپنی خدمات پیش کرے گا۔ بدلے میں سعودی عرب پاکستان کی معاشی ضروریات میں مدد کرے گا۔

خواجہ آصف نے کہا کہ مستقبل میں مزید پاکستانی لیبر سعودی عرب جا سکتی ہے اور امکان ہے کہ دیگر مسلم ممالک بھی اس دفاعی اتحاد کا حصہ بنیں۔ "مسلمان دنیا کو نیٹو جیسا اتحاد تشکیل دینا چاہیے”، انہوں نے زور دیا۔

یاد رہے کہ وزیراعظم شہباز شریف کے حالیہ دورۂ سعودی عرب کے دوران 18 ستمبر کو پاکستان اور سعودی عرب کے درمیان "اسٹریٹجک باہمی دفاعی معاہدے” پر دستخط ہوئے تھے۔ اس معاہدے کے تحت کسی بھی ایک ملک کے خلاف جارحیت کو دونوں ملکوں کے خلاف حملہ تصور کیا جائے گا۔