آئی ٹی سی این ایشیا کراچی 2025 عالمی شراکت داری کا اہم موقع

کراچی (امت نیوز)’ای کامرس گیٹ وے پاکستان’ کی جانب سے 26ویں آئی ٹی سی این ایشیا کا 23 سے 25 ستمبر تک کراچی میں انعقاد ہو رہا ہے۔وزارتِ آئی ٹی اینڈ ٹیلی کام اور ایس آئی ایف سی کے اشتراک سے اس تاریخی ایونٹ کے انعقاد کو آئی ٹی سیکٹر کی ترقی اور عالمی شراکت داری کا اہم موقع قرار دیا جارہا ہے۔پاکستان کی سب سے بڑی تین روزہ نمائش کا آغاز وفاقی وزیر برائے آئی ٹی اینڈ ٹیلی کام، محترمہ شزہ فاطمہ خواجہ کریں گی۔
آئی ٹی سی این ایشیا پاکستان کی ڈیجیٹل معیشت، سرمایہ کاری اور عالمی شراکت داری کو فروغ دے گا۔
ای کامرس گیٹ وے پاکستان، گروپ ڈائریکٹر محمد عمیر نظام کے مطابق
پاکستان کا آئی ٹی سیکٹر صرف ایک صنعت نہیں بلکہ معاشی تبدیلی کا انجن ہے۔آئی ٹی سیکٹر برآمدات میں اضافہ، اربوں کی سرمایہ کاری اور نوجوانوں کے لیے روزگار کے مواقع فراہم کر رہا ہے، محمد عمیر نظام کا کہنا ہے کہ ٹیک ڈیسٹینیشن پاکستان جیسے مؤثر اقدام کے تحت اس ایونٹ سے تکنیکی ترقی اور سرمایہ کاری کو فروغ حاصل ہوگا۔ایونٹ میں 50 ہزار سے زائد شرکاء بشمول ٹیک رہنما، سٹارٹ اپس، سرمایہ کار، پالیسی ساز اور سفارت کار شامل ہوں گے۔علاوہ ازیں 25 سے زائد ممالک کے عالمی وفود حصہ لیں گے، مستقبل کے کاروباری رجحانات کے متعلق تبادلہ خیال کیا جائے گا ۔700 سے زائد نمائش کنندگان اور 100 غیر ملکی مندوبین اے آئی، سائبر سیکیورٹی اور G5 ٹیکنالوجیز کی نمائش میں حصہ لیں گے۔ایس آئی ایف سی کی معاونت سے یہ ایونٹ قومی ٹیک ایکو سسٹم میں ترقی اور شراکت داری کو مضبوط کرے گا۔