اسحاق ڈار نیویارک پہنچ گئے، جنرل اسمبلی اجلاس میں شریک ہوں گے

نیویارک: نائب وزیراعظم و وزیر خارجہ اسحاق ڈار اقوام متحدہ کی جنرل اسمبلی کے اجلاس میں شرکت کے لیے نیویارک پہنچ گئے۔

وزیراعظم شہباز شریف بھی آج نیویارک پہنچیں گے جہاں وہ جنرل اسمبلی کے 80ویں سالانہ اجلاس میں پاکستان کی نمائندگی کریں گے۔ یہ اجلاس 22 سے 26 ستمبر تک جاری رہے گا۔

نیویارک آمد پر اسحاق ڈار کا استقبال پاکستان کے مستقل مندوب برائے اقوام متحدہ عاصم افتخار احمد، امریکا میں پاکستانی سفیر رضوان سعید شیخ اور مشن کے دیگر سینیئر حکام نے کیا۔

دفتر خارجہ کے مطابق وزیراعظم اپنے خطاب میں مقبوضہ جموں و کشمیر، فلسطین خصوصاً غزہ کی صورتحال پر عالمی برادری کی توجہ مبذول کرائیں گے اور عملی اقدامات کی ضرورت پر زور دیں گے۔ وہ علاقائی سلامتی، ماحولیاتی تبدیلی، دہشت گردی، اسلاموفوبیا اور پائیدار ترقی جیسے امور پر بھی پاکستان کا مؤقف پیش کریں گے۔

اسحاق ڈار کا شیڈول خاصا مصروف ہے، وہ وزیراعظم کے ہمراہ اجلاسوں میں شرکت کے ساتھ ساتھ درجنوں وزارتی اور اعلیٰ سطح کی ملاقاتیں بھی کریں گے۔