حارث رؤف پر جرمانہ محسن نقوی ادا کریں گے، بھارتی میڈیا کا دعویٰ

 

بھارتی میڈیا نے دعویٰ کیا ہے کہ قومی کرکٹ ٹیم کے فاسٹ بولر حارث رؤف پر عائد جرمانہ پاکستان کرکٹ بورڈ (پی سی بی) کے چیئرمین محسن نقوی اپنی جیب سے ادا کریں گے۔

بھارتی ویب سائٹ کے مطابق یہ دعویٰ ایک پاکستانی نجی ٹی وی کی رپورٹ پر مبنی ہے۔ خیال رہے کہ انٹرنیشنل کرکٹ کونسل (آئی سی سی) نے حارث رؤف کو ضابطہ اخلاق کی خلاف ورزی پر میچ فیس کا 30 فیصد جرمانہ کیا تھا۔

ایشیاء کپ کے سپر فور مرحلے میں اوپنر صاحبزادہ فرحان کو جشن منانے کے انداز پر صرف وارننگ دی گئی تھی، تاہم بھارتی کرکٹ بورڈ (بی سی سی آئی) نے آئی سی سی اور میچ ریفری اینڈی پائیکرافٹ کے سامنے دونوں کھلاڑیوں کے خلاف شکایات درج کرائی تھیں۔

یاد رہے دبئی انٹرنیشنل اسٹیڈیم میں کھیلے گئے میچ میں بھارت نے پاکستان کو چھ وکٹوں سے شکست دی تھی۔ دورانِ میچ فرحان نے نصف سنچری مکمل کرنے کے بعد گن فائر کے انداز میں جشن منایا تھا، جبکہ حارث رؤف نے وکٹ لینے کے بعد بھارتی تماشائیوں کی ہوٹنگ پر طیارہ تباہ ہونے کا اشارہ کیا تھا۔

بعد ازاں پی سی بی نے بھی آئی سی سی کے سامنے بھارتی کپتان سوریہ کمار یادو کے خلاف شکایت کی تھی۔ پی سی بی کے مطابق سوریہ کمار نے گروپ اسٹیج میچ کے بعد پہلگام واقعے کو سیاسی رنگ دیا، جو ضابطہ اخلاق کی خلاف ورزی ہے۔

ای ایس پی این کرک انفو کے مطابق آئی سی سی نے سوریہ کمار کو بھی قصوروار قرار دیتے ہوئے ان پر میچ فیس کا 30 فیصد جرمانہ عائد کیا۔ ان کی اپیل میچ ریفری رچی رچرڈسن نے مسترد کر دی۔

پی سی بی نے آئی سی سی سے مطالبہ کیا تھا کہ سوریہ کمار پر ضابطہ اخلاق کی لیول 4 کی سزا عائد کی جائے، جو سب سے سخت سزا تصور کی جاتی ہے۔