اقوام متحدہ میں پاکستانی قونصلر کا بھارتی الزامات پر کرارا جواب

نیویارک: اقوام متحدہ میں پاکستان کی قونصلر صائمہ سلیم نے بھارت کے الزامات کا بھرپور جواب دیتے ہوئے کہا ہے کہ جموں و کشمیر ایک متنازعہ علاقہ ہے جو کبھی بھی بھارت کا حصہ نہیں رہا۔

انہوں نے کہا کہ بھارت کی جانب سے سندھ طاس معاہدہ منسوخ کرنا عالمی قوانین کی سنگین خلاف ورزی ہے۔ بھارت نہ صرف خطے میں عدم استحکام پیدا کر رہا ہے بلکہ سرحد پار پراکسی گروپس کو بھی استعمال کر رہا ہے۔

صائمہ سلیم نے مزید کہا کہ بھارت میں اقلیتوں پر ظلم ڈھایا جا رہا ہے اور انہیں آزادی کے ساتھ عبادت کی اجازت تک نہیں، اقلیتوں کو دبانا اب حکومتی پالیسی کا حصہ بن چکا ہے۔

انہوں نے گجرات فسادات کا حوالہ دیتے ہوئے کہا کہ دنیا آج بھی اس واقعے کو ظلم کی بدترین مثال کے طور پر یاد کرتی ہے جہاں ہزاروں مسلمانوں کا قتل عام کیا گیا۔

پاکستانی قونصلر نے کہا کہ بھارت میں اسلامو فوبیا کو سیاست میں معمول اور میڈیا میں فخر سمجھا جا رہا ہے، جو عالمی امن کے لیے تشویشناک ہے۔