معروف پنجابی گلوکار راجویر جوندہ ٹریفک حادثے میں شدید زخمی

موہالی: بالی ووڈ فلموں کے معروف پنجابی گلوکار راجویر جوندہ ٹریفک حادثے میں شدید زخمی ہو گئے، ان کی حالت انتہائی تشویش ناک ہے۔

35 سالہ راجویر جوندہ ہماچل پردیش کے قریب موٹر سائیکل حادثے میں شدید زخمی ہونے کے بعد فورٹس اسپتال موہالی میں زندگی اور موت کی کشمکش میں مبتلا ہیں۔ڈاکٹروں کے مطابق ان کی حالت تاحال تشویش ناک ہے اور وہ وینٹی لیٹر پر ہیں۔

راجویر ہماچل پردیش کے علاقے بَدی کے قریب ٹریفک حادثے میں شدید زخمی ہو گئے، حادثہ اس وقت پیش آیا جب ان کی موٹر سائیکل سڑک پر موجود 2 مویشیوں سے ٹکرا گئی۔

گلوکار کو حادثہ گزشتہ روز پیش آیا جس کے بعد انہیں موہالی کے اسپتال  منتقل کیا گیا۔اسپتال انتظامیہ کے مطابق جوندہ کو دوپہر 1 بج کر 45 منٹ پر لایا گیا۔

اس سے قبل انہیں مقامی سول اسپتال لے جایا گیا تھا جہاں ان کا دل بند ہو گیا، تاہم فوری طبی امداد کے بعد انہیں فورٹس اسپتال موہالی منتقل کیا گیا۔

انتظامیہ کا کہنا ہے کہ گلوکار کو ایمرجنسی اور نیورو سرجری ٹیم نے فوری طور پر جانچ کے بعد ایڈوانس لائف سپورٹ پر رکھا ہے۔

حادثے کا سن کر مشہور اداکار و گلوکار دلجیت دوسانجھ نے  راجویر کے لیے دعائیہ پیغام جاری کیا ہے۔

حادثہ اس وقت پیش آیا جب ان کی موٹر سائیکل سڑک پر موجود 2 مویشیوں سے ٹکرا گئی، فائل فوٹو