کراچی: شہر کے مختلف علاقوں میں بارش ، سڑکوں پر پانی جمع ،ٹریفک جام

کراچی: خلیج کیمبے اور اس سے ملحقہ گجرات (انڈیا) پر موجود کم دباؤ کا علاقہ مغرب اور شمال مغرب کی طرف بڑھنے کے بعد محکمہ موسمیات نے سائیکلون کا دوسرا الرٹ جاری کر دیا۔

 بارش سسٹم کے زیر اثر شیر شاہ، بلدیہ، ماڑی پور، ہاکس بے، شہید ملت روڈ، گلشن اقبال، پی ای سی ایچ ایس، یونیورسٹی روڈ، پی آئی ڈی سی، بزرٹا لائن اور کالا پل سمیت دیگر علاقوں میں تندوتیز ہواؤں کے سبب ہلکی سے تیز بارش ہوئی۔

تیز بارش سے شہر کے نشیبی علاقوں میں پانی جمع ہوگیا جس سے ٹریفک کی روانی شدید متاثر ہوئی اور مختلف شاہراہوں پر بدترین ٹریفک جام ہوگیا، قیوم آباد سے جام صادق جانے والے راستے پر بدترین ٹریفک جام ہوگیا، چورنگی جام ہونے سے تمام راستے بند ہوگئے۔

دوسری جانب حسب معمول یا حسب عادت بارش ہوتے ہی شہر کے مختلف علاقوں میں بجلی بند ہوگئی اور اندھیرا چھا گیا، کے الیکٹرک کے درجنوں فیڈر بند ہوگئے۔

محکمہ موسمیات کے مطابق کراچی سے تقریباً 340 کلومیٹر جنوب مشرق میں سوراشٹرا، گجرات کے قریب ہے، امکان ہے کہ یہ نظام مغرب اور جنوب مغرب کی طرف بڑھے گا جبکہ رات یا کل صبح تک خلیج کَچھ کے ساتھ شمال مشرقی بحیرہ عرب میں ابھرے گا۔

۔سازگار ماحولیاتی حالات، سمندر کی سطح کا درجہ حرارت، کم یا اعتدال پسند ونڈ شیئر اور بالائی سطح کے ڈائیورژن کی وجہ سے، کل تک سسٹم کے مزید شدت سے ڈپریشن میں جانے اور ابتدائی طور پر مغرب پھر جنوب مغرب کی سمت بڑھنے کا امکان ہے۔

سسٹم کے زیر اثر تھرپارکر، عمرکوٹ، سانگھڑ، میرپورخاص، بدین، شہید بینظیر آباد، نوشہروفیروز، حیدرآباد، جامشورو، ٹھٹھہ، سجاول، ٹنڈو محمد خان، ٹنڈو اللہ یار میں آندھی اور گرج چمک کے ساتھ ہلکی سے درمیانی شدت کی بارش کا امکان ہے۔

مٹیاری کے اضلاع اور کراچی ڈویژن میں آج اور کل بارش کی پیشگوئی کی گئی ہے۔

سمندری حالات 45 سے 55 کلو میٹر فی گھنٹہ کی رفتار سے چلنے والی ہواؤں کے ساتھ ناہموار اور بہت ناہموار رہنے کا امکان ہے۔ سندھ کے ماہی گیروں کو ہدایت کی گئی ہے کہ وہ 2 اکتوبر تک گہرے سمندر میں نہ جائیں۔