پاکستان نے یوروبانڈ کی 500 ملین ڈالر ادائیگی کردی

اسلام آباد: پاکستان نے 500 ملین ڈالر مالیت کے یوروبانڈ کی ادائیگی بروقت مکمل کرلی ہے۔

مشیر خزانہ خرم شہزاد کے مطابق 2015 میں جاری ہونے والا 10 سالہ یوروبانڈ 30 ستمبر 2025 کو میچور ہوا، جس کے بعد حکومت پاکستان نے مکمل ادائیگی کی۔

خرم شہزاد نے کہا کہ قرضوں کی بروقت ادائیگی پاکستان کے مالی نظم و ضبط کا ثبوت ہے، اس سے لیکویڈیٹی کی صورتحال بہتر ہوئی ہے اور عالمی اداروں کی جانب سے ملک کی کریڈٹ ریٹنگ میں بہتری بھی دیکھنے میں آئی ہے۔

ان کا کہنا تھا کہ سرمایہ کاروں کا اعتماد بڑھ رہا ہے اور بانڈز پریمیئم پر ٹریڈ ہو رہے ہیں۔ انہوں نے مزید بتایا کہ قرض کا جی ڈی پی تناسب 77 فیصد سے گھٹ کر 70 فیصد پر آ گیا ہے جبکہ کل سرکاری قرض میں بیرونی قرض کا حصہ بھی 38 فیصد سے کم ہو کر 32 فیصد رہ گیا ہے۔

مشیر خزانہ کے مطابق مالی سال 2025 میں قرض بڑھنے کی رفتار نمایاں طور پر سست رہی، جبکہ عالمی سطح پر قرض لینے کی لاگت میں کمی سے پاکستان کو مزید فائدہ ہوگا۔