وزیراعظم کی گلوبل صمود فلوٹیلا پر اسرائیلی فوج حملے کی شدید مذمت

اسلام آباد: وزیراعظم شہباز شریف نے گلوبل صمود فلوٹیلا پر اسرائیلی فوج کے حملے کی شدید مذمت کی ہے اور کہا ہے کہ فلوٹیلا میں موجود 44 ممالک کے 450 سے زائد امدادی کارکن غیرقانونی طور پر حراست میں لیے گئے ہیں۔

وزیر اعظم نے کہا کہ ان کارکنان کا واحد مقصد مظلوم فلسطینی عوام تک انسانی امداد پہنچانا تھا۔ انہوں نے ان افراد کی فوری رہائی اور امدادی سامان کی بلا تعطل ترسیل کا مطالبہ کیا۔

شہباز شریف نے کہا کہ امداد مستحق افراد تک پہنچنی چاہیے اور اسرائیلی بربریت کو فوری روکنا اور فلسطین میں پائیدار امن قائم کرنا وقت کا سب سے بڑا تقاضا ہے۔

ادھر ترکی نے بھی فلوٹیلا پر اسرائیلی حملے کی مذمت کرتے ہوئے اسے دہشت گردی کا اقدام قرار دیا۔ یاد رہے کہ اسرائیلی بحریہ نے گلوبل صمود فلوٹیلا کی کئی کشتیوں پر دھاوا بول کر افراد کو حراست میں لے کر اسرائیلی بندرگاہ پر منتقل کر دیا تھا۔